काठमाडौँ, १ फागुन २०७५ । नेपाली कांग्रेसको जारी बैठकले बुधबार पार्टीको विधान, राजनीतिक र आर्थिक प्रस्तावलाई अन्तिमरूप दिने भएको छ । साथै कांग्रेसको भ्रातृ संगठन नेपाल विद्यार्थी संघको तदर्थ समितिको गठन गर्ने प्रक्रियालाई अगाडि बढाउने र अध्यक्षको चयन गर्ने सम्भावना रहेको छ ।

पार्टी सभापति शेरबहादुर देउवाको अध्यक्षतामा ललितपुरको सानेपास्थित पार्टी केन्द्रीय कार्यालयमा बसेको मङ्गलबारको बैठक मुख्य गरी विधान र संघको विषयमै केन्द्रित भएको जानकारी सहमहामन्त्री डा. प्रकाशशरण महतले दिनुभयो ।

उहाँले भन्नुभयो, ‘‘बैठकमा विधानमाथिको छलफल जारी रह्यो । केही विषय बाँकी छन् । बुधबार बस्ने बैठकमा विधान, राजनीतिक, आर्थिक सबै विषय टुङ्ग्याउने कुरो छ । नेविसंघको पनि नयाँ तदर्थ समिति आउन सक्छ ।’’ उहाँले संघको हालको समितिको कार्यकाल विधानतः समाप्त भइसकेकाले बुधबार तदर्थ समितिको अध्यक्षसम्म आउन सक्छ भन्नुभयो । संघको अध्यक्ष नैनसिंह महरले एकदिन अघिमात्र राजीनामा दिनुभएको थियो ।

केन्द्रीय सदस्य बहादुरसिंह लामाले बैठकमा बोल्ने नेताहरूले केन्द्रीय सभापतिदेखि केन्द्रीय सदस्यसम्म तल्लो तहबाटै निर्वाचित भएर आउनुपर्ने धारणा व्यक्त गरेको जानकारी दिनुभयो । कांग्रेसमा विवादको मुख्य जड नै सबै पदाधिकारी तलैबाट आउनुपर्छ र आउनु हुँदैन भन्ने रहेको छ ।

आरक्षणमा पनि एकपटकभन्दा बढी अवसर दिनु हुँदैन र दिनुपर्छ भन्ने विवाद पनि कायमै छ । यस विषयमा पार्टीमा छलफल जारी रहेकाले बुधबार निर्णय आउने जानकारी दिइएको छ ।

बैठकमा वरिष्ठ नेता रामचन्द्र पौडेल, महामन्त्री पूर्णबहादुर खड्का, केन्द्रीय सदस्यहरू प्रकाशमान सिंह, बलबहादुर के.सी., ज्ञानेन्द्रबहादुर कार्की, एनपी साउद, किशोरसिंह राठौर, गगनकुमार थापा, गुरुराज घिमिरे, प्रदीप पौडेल, कल्याणकुमार गुरुङ र मोहनबहादुर बस्नेतले विधान लगायतका विषयमा मत राख्नुभएको थियो ।

जानकारीको लागी तल फोटोमा किल्क गर्नु होला ,सुमेघ ट्राभल्स्