पोखरा, ६ साउन २०७६ । गण्डकी प्रदेशका मुख्यमन्त्री पृथ्वीसुब्बा गुरुङले विभिन्न सङ्घसंस्थाले गरेका अध्ययन अनुसन्धानबाट प्राप्त तथ्य र तथ्याङ्क विकासका लागि महत्वपूर्ण आधार बन्ने बताएका छन् ।

काठमाडौँ विश्वविद्यालय स्कुल अफ आर्टस, इन्टर डिसिप्लिनरी एनालिसिस र द एसिया फाउण्डेशनद्वारा सर्भेक्षण गरिएको तथ्याङ्क आज सार्वजनिक गर्दै उनले प्राप्त तथ्याङ्ककै आधारमा विकासका योजना तय हुने बताउनु भयो ।

अध्ययन अनुसन्धानका क्रममा जो कोही संस्थाले वस्तुनिष्ठ ढङ्गबाट सही तथ्य निकाल्नुपर्नेमा जोड दिँदै उनले त्यस्ता तथ्याङ्कले भावी कार्ययोजना तय गर्न महत्वपूर्ण सहयोग पुग्ने धारणा राखे । उनले काठमाडौँ विश्वविद्यालयसहित तीन संस्थाले तयार गरेको तथ्याङ्कसहितको प्रतिवेदन सरकारका लागि प्रेरणादायी हुने विश्वास व्यक्त गर्नु भयो ।

प्राप्त तथ्याङ्कअनुसार गण्डकी प्रदेश विकास निर्माणमा अघिनै देखिएको बताउँदै मुख्यमन्त्री गुरुङले कमजोरी देखिएका क्षेत्रलाई क्रमशः सुधार गर्दै अघि बढिने प्रतिबद्धता व्यक्त गरे । गण्डकी प्रदेशका सभामुख नेत्रनाथ अधिकारीले गलत तथ्याङ्कले योजना निर्माण एवम् त्यसको कार्यान्वयनमा प्रत्यक्ष असर पर्ने भएकाले सही तथ्याङ्क निकाल्नेमा अनुसन्धानकर्ता लाग्नुपर्ने बताउनु भयो ।

प्रदेशका आर्थिक मामिला तथा योजनामन्त्री किरण गुरुङले स्थानीय तहले विकास निर्माणका साथै सबै क्षेत्रको पारिवारिक तथ्याङ्क सङ्कलन गरिनुपर्ने औंल्याउनु भयो । कार्यक्रममा काठमाडौँ विश्वविद्यालय स्कुल अफ आर्टसका डा धिरज गिरीले ७३ जिल्लाका १८ वर्षमाथि उमेरका सात हजार ५६ व्यक्तिलाई छनोट गरी तथ्याङ्कक सर्भेक्षण एवम् विश्लेषण गरी निष्कर्ष निकालिएको जानकारी दिनु भयो  ।

विभन्न वर्ग र समुदायका व्यक्तिहरुसँग गरिएको प्रश्नउत्तरमा ५१।५ प्रतिशत उत्तरदाताले देश सही दिशामा अघि बढेको बताएको उनले जानकारी दिनु भयो । उहाले ३९।४ प्रतिशत उत्तरदाताले देश क्रमिकरुपमा गलत दिशातर्पm अघि बढेको र ९।१ प्रतिशतले यसबारे आफूहरु अनभिज्ञ भएको बताएको बताए । अध्ययनअनुसार राजनीतिक दल, प्रदेश र सङ्घीय संसद्का सदस्यमा जनताको विश्वास ३० देखि ४० प्रतिशत मात्र देखिएको उनले जानकारी दिनु भयो ।

काठमाडौँ विश्वविद्यालय स्कुल अफ आर्टसका डिन डा सागरराज शर्माले तथ्याङ्कको सत्यतथ्यताका लागि भरपुर प्रयास गरिएको जानकारी दिनु भयो । उनले सात वटै प्रदेशमा यस किसिमका कार्यक्रम गरी तथ्याङ्क सार्वजनिक गरिने र प्राप्त सुझावका आधारमा थप गहिराइमा पुग्ने बताउ । कार्यक्रममा प्रदेश सरकारका मन्त्री, प्रदेशसभा सदस्य, स्थानीय तहका जनप्रतिनिधि र प्राज्ञिक क्षेत्रका प्रतिनिधिको सहभागिता थियो । रासस

जानकारीको लागी तल फोटोमा किल्क गर्नु होला ,सुमेघ ट्राभल्स्