काठमाडौँ, मङ्सिर ८ गते । नारायणहिटी दरबारका खुल्न बाँकी रहेको १० वटा कोठा खुला गरिएको छ । संस्कृति, पर्यटन तथा नागरिक उड्डयनमन्त्री रविन्द्र अधिकारीको पहलमा गठित समितिले यी कक्ष खुलाएको हो ।

तत्कालीन बडामहारानीले शृङ्गार गर्ने सिन्धुली कक्ष, अन्य व्यक्तिले राजासँग भेट गर्ने झापा कक्ष, प्रधानमन्त्रीले सातामा एकपल्ट भेट्नका लागि खोलिने इलाम कक्ष खुला भएको हो । यस्तै जनै पूर्णिमामा शाही परिवारले जनै र डोरो बाँध्न मात्र प्रयोग हुने गरेको सुनसरी कक्ष, युवराज युवराज्ञीको जन्म उत्सवमा मुमा रत्नबाट भोज गर्ने गरिएको सप्तरी कक्ष र खाना खानुअघि भलाकुसारी गर्ने गरिएको सिराहा कक्ष पनि खुला गरिएको छ ।

सिनेमा हल, पुस्तकालय र शाही परिवारले दारी जुँगा मिलाउने सैलुन कक्ष भने अझै खुल्न बाँकी छ । यसबाहेक राजा वीरेन्द्रको निवास श्रीसदन पनि खुल्न भने बाँकी नै छ ।

पुरातत्व विभागका महानिर्देशक भेषनारायण दाहालका अनुसार जगमान गुरुङ, दामोदर गौतम, मदन रिमाल, रोहित ढुङ्गाना र अद्धैतप्रकाश श्रेष्ठ सम्मिलित समितिको सुझावअनुसार सरकारको निर्देशनपछि सर्वसाधारणको अवलोकनका लागि यो खुला गराइएको हो ।

दाहालका अनुसार कक्षको नामकरण विभिन्न स्थानको वा जिल्लाको नामबाट भए पनि भावनात्मक रूपमा ती क्षेत्रको भावना भने कक्षमा समेटिएको छैन । खोलिएका यी कक्ष शनिबारदेखि नै सर्वसाधारणले अवलोकन गर्न पाउने छन् ।
नारायणहिटी सङ्ग्रहालय प्रमुख अद्धैतप्रकाश श्रेष्ठका अनुसार अब पूर्वराजा वीरेन्द्रको निवास श्रीसदन खुला गर्नेतर्फ सङ्ग्रहालयले गृहकार्य गरिरहेको छ ।

पुरातत्व विभाग मातहत नभई मन्त्रालय मातहत रहन गएको यसलाई विभाग मातहत ल्याउने प्रयास भएको दाहाल बताउनुहन्छ । राजाको श्रीपेच हालै प्रदर्शनमा राखिएपछि सङ्ग्र्रहालयको आकर्षण बढेको छ ।

जानकारीको लागी तल फोटोमा किल्क गर्नु होला ,सुमेघ ट्राभल्स्